வெளிநாடுகளில் இருக்கும் இலங்கையர்களுக்கு இலவச விமான டிக்கெட்



தனிமைப்படுத்தல் மத்திய நிலையங்களில் நிலவும் இடவசதி பற்றாக்குறை காரணமாகவே வெளிநாட்டு வேலைவாய்ப்பில் ஈடுபட்டுள்ள இலங்கையர்களை அழைத்து வருவதில் தாமதம் ஏற்படுவதாக தொழில் அமைச்சர் நிமல் சிறிபால டி சில்வா தெரிவித்துள்ளார்.

அதற்கு வசதியாக நாட்டின் 09 மாகாணங்களிலும் ஒன்பது தனிமைப்படுத்தல் மத்திய நிலையங்களை அமைப்பதற்கு நடவடிக்கை எடுக்கப்படுமென்றும் வெளிநாடுகளிலிருந்து வருகை தரும் இலங்கையர்கள் அந்த மத்திய நிலையங்களில் தனிமைப்படுத்தலுக்கு உட்படுத்தப்படுவர் என்றும் அமைச்சர் தெரிவித்துள்ளார்.

வெளிநாட்டு வேலைவாய்ப்பு பணியகத்தின் நிதியில் அந்த தனிமைப்படுத்தல் மத்திய நிலையங்களை அமைப்பதற்கு நடவடிக்கை எடுக்கப்படுமென்றும் அது தொடர்பில் கொரோனா வைரஸ் தடுப்பு தேசிய மத்திய நிலையத்துடன் பேச்சுவார்த்தை நடத்த உள்ளதாகவும் அவர் தெரிவித்துள்ளார்.

மேலும் வெளிநாடுகளில் வசதி இல்லாதோருக்கு இலவச விமான டிக்கெட்டுக்கு ஏற்பாடு செய்து விரைவில் அனைவரும் அழைத்து வரப்படுவர் எனவும் குறிப்பிட்டார்.

இதேவேளை, நாட்டிற்கு திரும்பும் எதிர்பார்ப்புடன் வெளிநாட்டில் பணிபுரிபவர்களை நாட்டிற்கு அழைத்துவரும் நடவடிக்கையை பிரதமர் மஹிந்த ராஜபக்ஷவின் ஆலோசனைக்கமைய துரிதப்படுத்துவதற்கு நடவடிக்கை மேற்கொள்ளப்பட்டுள்ளது.

அதற்கமைய ஒரு வார காலத்திற்குள் இடம்பெயர்வுக்கான சர்வதேச அமைப்புடன் கலந்துரையாடி வெளிநாட்டில் பணிபுரிபவர்களை நாட்டிற்கு அழைத்து வருவது தொடர்பில் அவர்களது உறவினர்கள் மற்றும் பொதுமக்களை விழிப்பூட்டுவதற்கு நடவடிக்கை மேற்கொள்ளுமாறு வெளிநாட்டு வேலைவாய்ப்பு பணியகத்தின் தலைவர் கமல் ரத்வத்தே தெரிவித்தார்.

பொருளாதார நெருக்கடியால் பாதிக்கப்பட்டுள்ள வெளிநாட்டில் பணிபுரியும் ஏராளமான இலங்கையர்கள் நாட்டிற்கு திரும்ப முடியாது பாதிக்கப்பட்டுள்ளதாக இராஜாங்க அமைச்சர் பிரியங்கர ஜயரத்ன தெரிவித்தார்.

அதற்கமைய கொவிட்-19 தொற்றை கட்டுப்படுத்துவதற்கான ஜனாதிபதி செயலணியுடன் கலந்துரையாடி வெளிநாட்டில் பணிபுரியும் இலங்கையர்களை நாட்டிற்கு அழைத்து வருவதற்கு நடவடிக்கை மேற்கொள்ளப்படும் என பிரதமர் நம்பிக்கை வெளியிட்டார்.

இதுவரை வெளிநாட்டில் பணிபுரியும் 32000 இலங்கையர்கள் நாட்டிற்கு அழைத்து வரப்பட்டுள்ளதுடன், மேலும் 22483 பேர் தாய்நாட்டிற்கு திரும்பும் எதிர்பார்ப்புடன் உள்ளமை குறிப்பிடத்தக்கது.

hey