மட்டக்களப்பு சிறைச்சாலையில் அடைக்கப்பட்டு சுகயீனம் காரணமாக வைத்தியசாலையில் அனுமதிக்கப்பட்டு உயிரிழந்த கைதி, பிற கைதிகளால் தாக்கப்பட்ட நிலையில் உயிரிழப்பு ஏற்பட்டதாக அறிவிக்கப்பட்டுள்ளது.

குறித்த கைதியின் மரணம் தொடர்பான பிரேத பரிசோதனை அறிக்கை நேற்று (01.12) வெளியான நிலையில் மேற்படி அறிவிக்கப்பட்டுள்ளது.

இதன்படி கொக்கட்டிச்சோலை, முனைக்காடு பிரதேசத்தைச் சோந்த 47 வயதுடைய சோமசுந்தரம் துரைராஜா என்பவர் கடந்த 27 ஆம் திகதி கசிப்பு வழக்கில் பிடியாணை பிறப்பிக்கப்பட்டு பொலிஸாரால் கைது செய்யப்பட்டிருந்தார்.

குறித்த சந்தேகநபர் விளக்கமறியலில் வைக்கப்பட்டு சிறைச்சாலையில் அடைக்கப்பட்டார்.

இந்த நிலையில் குறித்த நபர் சிறைச்சாலையில் சம்பவதினமான கடந்த செவ்வாய்க்கிழமை (28) சிறைச்சாலையில் சுகயீனமடைந்த நிலையில் வைத்தியசாலையில் அனுமதிக்கப்பட்ட பின்னர் உயிரிழந்துள்ளார்.

இதனையடுத்து குறித்த சடலத்தை பிரேத பரிசோதனைக்கு உட்படுத்துமாறு மட்டக்களப்பு நீதிமன்ற நீதவான் பீற்றர் போல் உத்தரவிட்ட நிலையில்  30 ஆம் திகதி பிரேத பரிசோதனை மேற்கொள்ளப்பட்டது.

இதில்  மொட்டையான ஆயுதங்களால் தாக்கப்பட்டதாலேயே மரணம் ஏற்பட்டுள்ளதாக தெரிய வந்துள்ளது.

குறித்த கைதி, சிறைச்சாலையில் தடுத்து வைக்கப்பட்டிருந்த போது, அங்கு தடுத்து வைக்கப்பட்டிருந்த மற்ற கைதிகளுடன் முரண்பட்டு அந்தக் குழுவினர் அவரைத் தாக்கியதாக ஆரம்பகட்ட விசாரணையில் தெரிய வந்துள்ளதாக பொலிஸார் தெரிவித்தனர்.

இது தொடர்பான மேலதிக விசாரணைகளை மட்டு. தலைமையக பொலிஸார் மேற்கொண்டு வருகின்றனர்.