இலங்கையில்  இருந்து மலேசியா ஊடாக வெளிநாடுகளுக்கு சிறுவர்கள் கடத்தப்படுவது தொடர்பில் வெளிவிவகார அமைச்சு கவனம் செலுத்த வேண்டுமென பெண்கள் மற்றும் சிறுவர் விவகார இராஜாங்க அமைச்சர் திருமதி கீதா குமாரசிங்க தெரிவித்துள்ளார்.

நாடாளுமன்ற உறுப்பினர் தயாசிறி ஜயசேகர இன்று (30.11) எழுப்பிய கேள்விக்கு பதிலளிக்கும் போதே இராஜாங்க அமைச்சர் இதனைத் தெரிவித்தார்.

இதன்போது மேலும் கருத்து வெளியிட்ட அவர், “இந்த 13 குழந்தைகளும் மலேசியா சென்று வேறு நாடுகளுக்கு விற்கப்பட்ட செய்திதான் மக்களை அதிர்ச்சியில் ஆழ்த்தியது.

நான் குடிவரவுத் துறையின் தலைமைக் கட்டுப்பாட்டாளருக்கு போன் செய்தேன். 16 வயதுக்குட்பட்டவர்களை நாட்டுக்கு செல்ல அனுமதிப்பீர்களா என்று கேட்டேன். தற்போதைய சட்டத்தின்படி குழந்தைகள் தனி கடவுச்சீட்டு பெறலாம்.

மலேசியாவில் போலி கடவுச்சீட்டுகள் தயாரிக்கப்பட்டு இங்கிருந்து குழந்தைகள் கடத்தப்படுவதாக கூறப்படுகிறது.  இது மிகவும் முக்கியமான விடயம். இது தொடர்பில் வெளிவிவகார அமைச்சு கவனம் செலுத்த வேண்டும்” எனத் தெரிவித்துள்ளார்.

இது தொடர்பில் மெலினா பொலிஸ் ஊடகப் பிரிவு விடுத்துள்ள அறிக்கையில், மலேசியா ஊடாக வெளிநாடுகளுக்கு சிறுவர்கள் கடத்தப்படுவது தொடர்பில் குற்றப்புலனாய்வு திணைக்களம், கடத்தல் விசாரணை மற்றும் கடல்சார் குற்றப்பிரிவு ஆகியன விசாரணைகளை ஆரம்பித்துள்ளதாக கூறப்படுகிறது.

பொலிஸ் ஊடகப் பிரிவு நடத்திய விசாரணையின் போது, ​​வடகிழக்கு பிரதேசங்களில் வசிக்கும் 18 வயதுக்குட்பட்ட தமிழ் சிறுவர்கள் மலேசியாவிற்கு அனுப்பப்படுவதாக அறிவித்துள்ளனர்.

இந்த குழந்தைகள் இந்த நாட்டில் இருந்து மலேசியா செல்வதற்கு சட்டபூர்வ கடவுச்சீட்டை பயன்படுத்துவதாகவும், மலேசியாவில் போலி கடவுச்சீட்டு தயாரித்து பிரான்ஸ் மற்றும் பிரித்தானியாவுக்கு அனுப்பப்படுவதாகவும் தெரியவந்துள்ளது.

இந்த நாட்டிலிருந்து சுமார் 13 சிறுவர்கள் மலேசியாவுக்கு அனுப்பப்பட்டுள்ளதாகவும், இதில் இடைத்தரகர் கடத்தல்காரர் ஒருவர் ஈடுபட்டுள்ளதாகவும் தெரியவந்துள்ளது.